Sco vus haveis segiramein intervegniu ord las medias ni silla pagina dil cantun Grischun vegnan las scolas serradas naven da gliendisdis proxim, ils 16 da mars 2020.
Ils affons duein restar a casa ed evitar sentupadas cun gruppas da conscolars ni autras persunas. Secapescha ch’gil ei lubiu dad ir ora el liber, denton era leu duei vegnir evitau gruppas da glieud. La responsablad ed il spazi d’agir schai tier ils geniturs.
Per famiglias che han buc in’autra pusseivladad da survigilonza che tat e tatta, organisescha la scola in program da survigilonza correspundent per la jamna dils 16 tochen ils 20 da mars. Quel cuozza mintga di maximalmein naven dallas 07.30 uras tochen las 18.00 uras.
Naven dils 21 da mars ein las famiglias obligadas dad organisar ina survigilonza che corrispunda allas perscripziuns cantunalas e federalas. Fuss quei ord differents motivs buca pusseivel, lu supplicheschel jeu vus da contactar la direcziun da scola per anflar ina sligiaziun individuala.
Affons malsauns ni cun simtoms da grippa san buca far diever da quella purschida. Quels affons duein restar a casa e vegnir survigilai da bab ni mumma, ni dad ulteriuras persunas carschidas ch’appartegnan buca alla gruppa da risico. Las recumandaziuns dils uffecis federals e cantunals ein da suandar vinavon.
Dapli informaziuns e datagls davart la cuntinuaziun vegnin nus a tarmetter als geniturs per mail ni publicar cheu silla pagina el decuors dalla jamna proxima.