Cun l’entschatta digl onn da scola 2020/21 (01-08-2020) surprenda Robin Frederik Egger la direcziun dalla scola Lumnezia. El succeda a Conradin Caduff, che surprenda suenter biars onns da survetsch sco persuna d’instrucziun e menader da scola la nova sfida sco inspectur da pumpiers cantunal dil cantun Grischun. Robin Egger ei carschius si a Samedan. El tschontscha currentamein puter e capescha senza problems sursilvan.
Robin Egger ha terminau la scolaziun pedagogica sco scolast all’universitad da Graz. Dapi 2017 eis el engaschaus sco persuna d’instrucziun da classa ed instruescha ils roms linguistics alla scola superiura Grüsch/Seewis. La stad 2019 ha el surpriu supplementarmein in pensum parzial sco menader da scola tier la scola da migrants a Tavau e Schiers. La scolaziun sco menader da scola vegn el a terminar la stad 2021.
Il Cussegl da scola ha elegiu Robin Egger sin fundament d’in process da recrutaziun conscienzius. Sper sias qualificaziuns dil fatg sco persuna d’instrucziun dil scalem superiur ha el perschuadiu cun cumpetenzas aquistadas davart il plan d’instrucziun 21 ed igl emprender orientau allas cumpetenzas. Signur Egger ha 31 onns, ei maridaus e bab dad in fegl. El habitescha cun sia famiglia a Cuera.
El num dall’entira scola Lumnezia beneventa il Cussegl da scola cordialmein Robin Egger sco niev menader da nossa scola.