Cars affons, preziai geniturs
Prest duas jamnas ein vargadas dapi la partenza cun l’instrucziun a distanza. Jeu hai l’impressiun che nus seigien denton gia daditg en quei modus. Jeu sun denton fetg sattisfatgs da quei che nus havein contonschiu. Il temps avon il monitur ei deplorablamein carschius considerablamein, cunzun tier ils scolars dalla 5.-9. classa. Igl ei perquei fetg impurtont d’anflar in bien equiliber denter las differentas occupaziuns.
Il davos temps hai jeu astgau retscheiver beinenqual cumpliment per nossa lavur e per l’organisaziun ed informaziun. Quei ei naturalmein fetg legreivel e nus havein grond plascher. Cordial engraziament persuenter.
El num da tut las persunas d’instrucziun, dalla direcziun da scola e dil cussegl da scola admettel jeu in grond cumpliment ed engraziament era a vus geniturs ed affons per vossa gronda lavur a casa e per la fetg buna collaboraziun.
Grond plascher havein nus adina puspei da fotografias che muossan empauet vossa lavur a casa. Ellas vegnan publicadas dafertontier sin la pagina da scola, www.scolalumnezia.ch. Ei vala la peina da dar in’egliada!
Il Cusseglier guvernativ, Dr. Jon Domenic Parolini, engrazia allas scolas:
«Prest èn passadas quatter emnas dapi la decisiun da serrar las scolas pervi da la derasaziun dal coronavirus. L’ultim temp è stà intensiv: Per nossas scolaras e noss scolars nus ans avain fatschentà cun la planisaziun e la realisaziun da las incumbensas centralas areguard la surveglianza e l’instrucziun a distanza. Oz poss jau constatar cun satisfacziun ch’ils responsabels en las scolas han lavurà fitg bain ed uschia contribuì essenzialmain per pudair dar dumogn a la situaziun extraordinaria en il sectur da scola. Per quai As vi jau cun quest scriver engraziar persunalmain e da tut cor.”
Il departement d’educaziun, cultura e protecziun digl ambient risguarda las directivas federalas e relascha sin quella basa las suandontas reglamentaziuns per il Cantun Grischun:
- Igl onn da scola 2019/20 vegn renconuschius el cantun Grischun sco onn da scola cumplein. Quei vala independentamein dil cuoz dalla situaziun actuala cun l’instrucziun a distanza.
- Ils plans da scola e da vacanzas restan vinavon valeivels. Las vacanzas han liug tenor plan e vegnan buca duvradas per instrucziun.
- Igl onn da scola 2019/20 dat ei era attestats. Il fatg che l’instrucziun ei vegnida menada per ina part digl onn da scola pervia dalla pandemia da corona sco instrucziun a distanza vegn remarcaus egl attestat.
- Sin fundament dalla situaziun extraordinaria ei la purschida da survigilonza era da mantener duront las vacanzas, da gliendisdis tochen venderdis, dallas 07:30 – 18:00 uras. Ils affons che fan diever dalla purschida portan sezs il gentar en scola. In’annunzia precedenta alla scola cun indicar daco ch’ina survigilonza privata ei buca pusseivla, ei vinavon obligonta.
Nus sperein da saver informar vus l’autra jamna con ditg ch’igl ei aunc previu instrucziun a distanza e co il retuorn en scola duei succeder.
Sperond sin ina finiziun dalla situaziun extraordinaria il pli spert pusseivel, giavischein nus a vus e vossas famiglias bialas Pastgas.
Per la scola Lumnezia, il menader da scola