Monat: Mai 2020

Engraziament per las fotografias en connex cun l’instrucziun a distanza

Nus havein retschiert ina massa fotografias che muossan differentas impressiuns dall’instrucziun a distanza. Vus saveis mirar ellas sin nossa pagina d’internet dalla scola (scolalumnezia.ch).

Uraris e material da scola

Ils geniturs ein obligai da tarmetter a scola lur affons cura che l’instrucziun da presenza entscheiva. Scolarets e scolars serendan il gliendisgis, ils 11 da matg 2020 sco usitau en scoletta/scola. L’instrucziun cuntinuescha tenor ils uraris da scola 2019/20. Ils scolars retuornan en scola cun lur material ch’els drovan per l’instrucziun. 

Transports

Ils transports da scola succedan culs autos da posta tenor urari usitau. Nus supplichein da far attents vos affons da secuntener egl auto da posta tenor las directivas dil persunal digl auto da posta. Adatg, naven da Gliendisdispastgas ein ils transports buca pli gratuits. Tuts affons ston perquei ussa puspei haver il bigliet da posta per mintga viadi. El cass da controllas surprendan ils geniturs las consequenzas finanzialas sch’il bigliet maunca.

Reglas da higiena

Igl ei impurtont da setener vid las reglas da higiena recumandadas. Il placat enconuschent cun las reglas valeivlas penda en differents loghens en mintga casa da scola ed ils mieds per lavar ils mauns ein a disposiziun. Las persunas d’instrucziun informeschan ed instrueschan lur scolars/scolarets corrispundentamein. Nus sespruein da setener vid la duida distanza, surtut tier scolars pli vegls. Cheu ein cunzun ils scolars sezs dumandai da surprender responsabladad. Nus essan denton pertscharts che quei ei buca adina pusseivel duront il menaschi da scola. 

Medemamein dessistin nus da dar il maun. Era sin embratschadas denter scolars e scolaras duei pil mument vegnir dessistiu.

Pausas

Las pausas han liug el liber. Ils affons duein buca parter maglias e bubrondas culs auters. Las persunas d’instrucziun vegnan a tematisar quei cun lur scolars.

Meisa da miezgi

La meisa da miezgi sa buca vegnir offerida el da casa val lumnezia. La scola ei vidlunder d’organisar in’alternativa, probablamein ell’aula dalla casa da scola a Vella. La survigilonza tochen las vacanzas da stad surprendan las persunas d’instrucziun.

Affons e confamigliars ella gruppa da risico

El cass che la viseta dall’instrucziun ei muort motivs da sanadad digl affon ni da confamigliars absolutamein buca pusseivla, supplichein nus da s’annunziar directamein tier il menader da scola.

Viadis ed occurrenzas da scola

Ils viadis da primavera fagein nus buca ella fuorma usitada. Forsa fa ina ni l’autra classa in’excursiun ella regiun. Il gi primavaun dil scalem primar ha buca liug uonn. Sch’il gi da sport e savida dil scalem superiur sa vegnir menaus atras vegn decidiu pli tard. Ulteriuras occurrenzas vegn ei buc a dar quest onn da scola, quei per evitar accumulaziuns da persunas.

Onn da scola / attestats da scola

Igl onn da scola 2019/20 quenta – malgrad l’instrucziun speciala – sco onn da scola cumplein. Els attestats vegn remarcau «instrucziun senza presenza dils 16-03 – 08-05-2020 muort la pandemia COVID-19”. Tut ils scolars vegnan promovi ella proxima classa.

Temps ordeifer la scola

El temps liber valan las reglas da higena, mo era la regla da 5 persunas. Affons astgan giugar in cun l’auter, denton sche pusseivel adina ils medems ensemen e buca dapli che 5 persunas. Perquei eis ei d’evitar rimnadas da scolars cun dapli che 5 persunas era sin plaz publics. 

Affon cun simtoms

Ei quei il cass, lu supplichein nus dad annunziar quei immediatamein alla persuna d’instrucziun da classa. Igl affon resta a casa en quarantena. Las ulteriuras instrucziuns vegnan commiunicadas il mument che nus havessen in tal cass. 

Extract ord COVID-19 «Grundprinzip Aufnahme des Präsenzunterrichts an den obligatorischen Schulen»

«Personen, welche Krankheitssymptome aufweisen, sollen sich in Isolation begeben. Personen, welche einen engen Kontakt mit einer erkrankten Person hatten, insbesondere auch im Rahmen des familiären Zusammenlebens oder Intimkontakte, sollen sich in Quarantäne begeben gemäss den geltenden Empfehlungen des Bundesamtes für Gesundheit und den Weisungen und Anordnungen der kantonalen Gesundheitsbehörden. Das Miteinander der Kinder im schulischen Setting wird nicht als enger Kontakt definiert. Falls jedoch gehäufte Fälle in einem schulischen Setting vorkommen, muss gemäss der Definition enger Kontakt vorgegangen und eine Quarantäne umgesetzt werden… »

Visetas en scola/sigl areal da scola

Persunas carschidas ch’ein buca involvadas directamein el menaschi da scola duein evitar d’entrar sigl areal da scola. Era discuors cun geniturs el liug succedan mo en cass urgents. Diuscuors san succeder al telefon ni sco conferenza da video.

Nus sperein sin ina buna finiziun digl onn da scola e che la situaziun senormaliseschi beingleiti. Tier damondas saveis vus bugen contactar la persuna d’instrucziun da classa ni il menader da scola.

Ulteriuras informaziuns suondan el decuors dil meins matg.